ភ្នំពេញ៖ នាយករដ្ឋមន្រ្តី សម្ដេចតេជោ ហ៊ុន សែន អំពាវនាវឱ្យពលរដ្ឋបន្តការប្រុងប្រយ័ត្ននិងចូលរួមអនុវត្តការពារឱ្យបានទាំងអស់គ្នានូវវិធានការ៣កុំ ៣ការពារ ដើម្បីកុំឱ្យមានការ កក្រើកឡើងវិញនៃការឆ្លងរីករាលដាលនៃជំងឺកូវីដ-១៩ បន្ទាប់ពីការមានការជួបជុំក្នុងពិធីបុណ្យភ្ជុំបិណ្ឌ។
ក្នុងសារសម្លេងពិសេសនៅថ្ងៃទី១២ ខែកញ្ញា ឆ្នាំ២០២២នេះ សម្ដេចតេជោ ហ៊ុន សែន បានអំពាវដល់ប្រជាពលរដ្ឋឱ្យបន្តនូវវិធានការរបស់សុខាភិបាលនៅពេលធ្វើដំណើរទៅកាន់ទីវត្តអារាមឬទីកន្លែងនានា ដែលវាតម្រូវឱ្យមានការចូលរួមយកចិត្តទុកដាក់ពីសំណាក់ ព្រះអង្គ គ្រហស្ត និងប្រជាពលរដ្ឋមកពីគ្រប់មជ្ឈដ្ឋាន ដែលពាក់ព័ន្ធនឹងដំណើរការសង្គមសេដ្ឋកិច្ចនេះ។
សម្ដេចតេជោថា៖ «ប៉ុន្តែទោះបីថា ជំងឺឆ្លងនេះវាឋិតនៅហានិភ័យទាបក៏ដោយចុះ ខ្ញុំព្រះករុណាខ្ញុំនៅតែបន្តអំពាវនាវចំពោះព្រះតេជគុណ ព្រះសង្ឃគ្រប់ព្រះអង្គនៅតាមទីអារាមនានា ជាពិសេសព្រះចៅអធិការនៅតាមវត្តនីមួយៗ ក៏ដូចជាប្រជាពលរដ្ឋដែលទៅធ្វើបុណ្យទានត្រូវបន្តនូវវិធានការសុខាភិបាល ហើយយកចិត្តទុកដាក់ទៅលើការការពារកុំឱ្យមានការរីករាលដាល ការឆ្លងទៅតាមទីអារាម ហើយពីទីអារាមមកកាន់លំនៅដ្ឋានវិញ»។
សម្ដេចតេជោសង្ឃឹមថាប្រជាពលរដ្ឋនឹងមានការយោគយល់និងយកចិត្តទុកដាក់ក្នុងការការពារខ្លួនតាមរយៈការបន្តអនុវត្តនូវវិធានដែលក្រសួងសុខាភិបាលបានចេញផ្សាយកន្លងមក ក៏ដូចជាការរៀបចំឱ្យបានល្អនៅតាមទីវត្តអារាមនានាផងដែរ។
មួយវិញទៀតអាជ្ញាធរនិងផ្នែកសុខាភិបាលត្រូវបន្តការយកចិត្តទុកដាក់ធ្វើការចុះពិនិត្យមើលជាប្រចាំដើម្បីចៀសវាងការកក្រើកឡើងវិញនៃការប្រមូលផ្ដុំប្រជាពលរដ្ឋនៅតាមទីអារាម និងការបន្ត៣កុំ ៣ការពារ៕
